Skip to Content

PUISI-PUISI FITRI YANI

Foto SIHALOHOLISTICK

RAJA GUNTUR BUMI PENIHING1)
di lom janji, nyak rila nutuk niku
di uncukni bumi paling ngison
ngandanko kemuarian
tutukan anak-umpu jemoh saway

wat pak anakku laher di bahway:
Pesanggah Temunggung Gedung
Wisesa betungga Ratu Serambak
Dewa Marga
Karya
pisah tian kaduni mid sukau, krui, rik kalianda
Wisesa nguyunko kita di bahni pesagi
betungga Ratu Serambak
laher muneh umpu-umpu kita

kidang, tulung tanyako jama badanmu, ragahku
jama junjungan anak umpumu
lagi aga diingokko tian kudo
ragah rik bebai tuha
sai lapah jaoh ngusung isi kerajaan Banten
lagi aga mupakat kudo
sunyin keturunan jama keturunan Bahway

mani waktu sapa sai pandai
mutusko sunyin ingoan kak medomko mata

di lom janji
nyak rila nyerahko diri jama niku, raja pusaka
nyin nanti anak-umpu kita paham
api artini jadi tutukan
api artini nguyunko lamban.
2012
1) Raja Guntur Bumi Penihing yado de Raja sai berasal jak Banten, menurut cerita tumbai, sekitar tahun 1663, kerajaanni mid Liwa daleh ngebangun kerajaan di Bahway, salah satu keturunanni ya de Raja Wisesa, sai keramatni maseh wat sampai tanno. Jak keturunanni Raja Wisesa laher raja-raja sai sampai tanno wat di Kutaraja, Liwa.



KEMUMU
sang degok way di unggak bulung
kemincak kedugok di bah pampang
kekati langui di pingger-pingger kulam
batu alom dibi manom

way di bulung kemumu
di bah sinar bulan bara
numpang liyu
kadu ya gugor di batu alom
mak dapok mesaka aga tigaga

kak rakakni radu jadi talos
kambang-kambang radu melayu
kemumu nganakko tunas baru
2013

MUNGGAK-MEDOH
kik niku halian
lapahanmu nutuk renglaya
sai jak bahni
medoh mid sabah-sabah
teliyu mid siring-siring
taru di lawok jaoh
munggak luot mid langik
kambor di hantara burung-burung
diurau-urau angin
mid rang sai mejaoh jak lawok
kaduni lebon gugor jadi wayni terai

kik niku terai
suratanmu gugor munggak-medoh
mak taru-taru, mak ngilu waktu
gugor di bulung lidang
jadi kambang di bebatan
ngeratongi bumi
nyinggahi rang-rang
sai senangong renglayamu

kik niku bebatan, garisanmu tilapahi
jak unggak jak doh, jak tumbai jak tanno
nerima tiilik-ilik, buserah tiratongi rik tilijungi
kekala wat sai tedaya, kekala wat sai pehalu

rua arah rua tawok rua uncuk
mid-muloh, radu-makung
debingi-derani, alom-andak
lawok rik langik, di hantarani
way-way ngehuap
gugor muneh di bebatan
luncat-luncat injuk kambang
2013

--------------
Fitri Yani, laher di Liwa, 28 Februari 1986. Pepira puisini timuat di lom media cetak rik antologi puisi. Pernah nutuk Pertemuan Penyair Nusantara V dan VI, Ubud Writers and Readers Festival (2011), Temu Sastrawan Indonesia IV (2011), Festival Puisi dan Lagu Rakyat Antar-Bangsa Pangkor, Malaysia (2012). Buku kumpulan puisi bahasa Lampungni sai ampai aga terbit judulni Suluh.

Tulis komentar baru

Materi isian ini bersifat rahasia dan tidak ditampilkan ke publik.


Terpopuler Hari Ini

Sebulan Terakhir

Terpopuler