Skip to Content

Ape Luh Liat Liat !!!

Foto Jabrik

 

lepas lohor eni bang Jabrik amé Mamat lagi padé nongkrong di pos kamling deket pangkalan ojek kampungnyé.. rupenyé dari roman muké bang Jabrik keliatan lagi kesel, lantaran mukenyé kusut kayé bocah abis digebukin amé emaknyé..
...

"Apé luh liat liat.." bentak bang Jabrik mbari melotot amé orang nyang liwat.

"dasar.." kurang kerjaan luh.." celetuk Mamat mbari ngisep rokoknyé lagi.

"bukan begitu mat.. la pan elu liat kendiri, entu orang kaga ade sopannyé lewat sini.."

"yéé abang.. ini kan jalan umum bang.. siapé ajé boleh seenak pusernyé kalo liwat sini.."  saut Mamat sembari milin milin rokoknyé nyang ampir mati apinyé..

"lagian.. urusan ruméééh... abang bawé bawé kesini.. emang empok Siti masih maréh yéé amé abang.." ejek Mamat..

"setan lu mat.. kenape elu nyang rungsing amé urusan gua.. dah ahh gua mao pulang dulu.." katé bang Jabrik ninggalin Mamat nyang masih nyengir nyengir kendiri..
...

Nyampe rumehnye, bang Jabrik lansung ajeé ngeloyor masup kamaryé..
...

"bang.. abaaangg.." teriak mpok Siti dari belakang ruméh.

"iyéé.. kenapé sih luh.. jejoakan ajé kayé soang abis kejebur empang.."

"udéh abang bayarin belon kualinyé.."

"belon.." saut bang Jabrik sedikit kesel. "nah elu.. pegimané sih.. ngambil gituan kagak bilang bilang amé gua, jadinyé pan gua nyang gelagepan wéktu si Udin (tukang kredit. Sus.) nagih amé gua.." celetuk bang Jabrik agak sewot sembari mbenerin peci itemnyé nyang rada miring.
...

"ééhhh.. baaang.. emangnyé abang udéh kagak butuh makan yéé.. saban hari maunyé ngegares nyang enak enak, tapi kagak liat tuuh.. perabotan kité nyang padé rusak.."

"ayé mau masak paké apé baaang.. kalo kagak ngredit dulu entu kuali amé mang Udin.." bales mpok Siti mbari nerusin nyuci baju.

"lagian yéé baang... jaman sekarang ntu udéh lumréh ngredit.. apelagi kité.. entu tuh.. orang orang kayé ajé padé ngredit mobil buat gayé gayéan.. bikin macet jalan ajé.."

"padahal yéé baang.. pemerintéh udéh nyiapin BasWe buat orang orang supayé Jakarté kagak macet lagi.." katé mpok Siti sok tau dikit.
...

"ahhh sok tau luh.." saut bang Jabrik.

"yéé abang dibilanginnyé.." saut mpok Siti mbari ngeloyor masup ruméh ke kamarnyé ninggalin cuciannyé nyang ampir selesé..

"pokoknyé ayé kagak mau tau..!! abang bayarin kagak tuh kualinyé.. kalo kagak , liat ntar malem.. ayé kagak kasih.. biar abang tidur amé nyamuk diluar.."

entu kan udéh kewajiban abang sebagé laki.. kudu nyari nafkah buat anak bini.. nyukupin semué keperluannyé.. bukan cumé urusan gituan doangan nyang abang kasih.." bentak mpok Siti mbari melotot amé lakinyé..
...

rupényé bang Jabrik rada gedér jugé ngeliat bininyé nyang melotot sembari tolak pinggang. Tapi emang dasar bang Jabrik bukan orang nyang panasan kalo liat bini lagi maréh, dié langsung ajé nyelonong masup dapur sembari ngebentak "Apé luh liat liat..!!!" amé kuali nyang ngegantung di dapur rumehnyé..

 

 

..::TAMAT::..

(by. Jabrik)


ditulis oleh Jabrik pada: 19 Januari 2012; jam 18:12 ◄

Cerita Betawi ini pertama kali saya tulis di akun facebook saya, dengan judul yang sama "Apé Luh Liat Liat !!!". Dan khusus pada catatan itu saya membalas semua komentar yang ada dengan bahasa dan logat Betawi. Bisa dilihat sumber aslinya disini

nb.

semua nama tokoh cerita di catatan ini hanya fiktif belaka, mohon maaf kalo ada kesamaan, itu berasal dari ketidak  sengajaan saya.. mohon maaf jugé buat pemerhati dan kritikus2 sastra betawi, "ayé baru belajar nulis nih bang.. sesué amé apé nyang ayé temuin di tanah betawi dari orok ampé gede segini.. maaf yéé bang.."

Komentar

Tulis komentar baru

Materi isian ini bersifat rahasia dan tidak ditampilkan ke publik.


Terpopuler Hari Ini

Sebulan Terakhir

Terpopuler